GOD is 2BIG

Tunay nga, “God is 2BIG!”

Ang Diyos na Tubig ng Buhay at nakakapawi ng anumang pagkauhaw, ay isang MALAKING Diyos. 

GOD is too BIG. 

Higit Siyang malaki kaysa Jerusalem. Hindi natin Siya maikukulong at masasabing, “Sa amin lamang ang Diyos!” o “Nasa amin lamang ang Diyos!” Kaya naman mapapapurihan at masasamba natin Siya kahit saan at kahit kailan. 

GOD is too BIG. 

Gaano kalaki ang iyong Diyos? Higit Siyang malaki kaysa sa ating mga alalahanin, kinatatakutan at problema. Kaya pwede nating isigaw, “Probleeeemmmmmm I have a big GOD!” At sa panahong ito ng pagkabalisa maaari nating mapanghawakan, “God must be too big, bigger than COVID.”

Mga Pagbasa pra sa Araw ng

Linggo, March 15

3rd Week, Lenten Season

Exodus 17:3-7

Psalm 95

Romans 5:1-2,5-8

John 4:5-42

📷Unsplash.KOBU.Agency

🧠Rev. Cesar D. Valencia Jr. 

Uuwi sa Iyo

Hindi ang kung ilang beses na tayong nagkamali ang binibilang ng Diyos. Ang binibilang Niya ay ang nasasayang na oras sa hindi natin pagbalik sa Kanya. Sabik Siya sa ating pag-uwi. Hindi parusa ang nag-aabang sa atin kundi ang Kanyang pag-ibig. 

Mga Pagbasa para sa Araw ng

Sabado, March 14

2nd Week, Lenten Season

Micah 7:14-15,18-20

Psalm 102

Luke 15:1-3,11-32

📷Internet.Photo

📝revjeffcoz

Iwaksi ang Inggit

Nakamamatay ang inggit — tinutuldukan nito ang mga dating buhay ba relasyon at pinaparalisa at binabarahan nito ang pagdaloy ng grasya. 

Sa Unang Pagbasa para sa Araw ng Biyernes, inilahad na: Mas mahal ni Jacob si Jose kaysa sa ibang mga anak. (Genesis 37:3) Ito ang naging mitsa ng pagkainggit ng mga kapatid ni Jose na nauwi sa pagkamuhi, takdang pagpatay at pagbibili kay Jose sa mga Ismaelita upang gawing alipin. 

Hahamakin ng inggit ang lahat. Walang kapa-kapatid. Walang kadu-kadugo. 

Ngayong Panahon ng Kuwaresma, pagkakataon upang makapagpanibago, magawa sana nating maiwaksi ang inggit sa ating mga puso. Matuto tayong magalak sa paglago ng kapwa at maging mapagpasalamat sa kung ano ang sapat na meron tayo. 

Mga Pagbasa para sa Araw ng

Biyernes, March 13

2nd Week, Lenten Season

Genesis 37:3-4,12-13,17-28

Psalm 105

Matthew 21:33-43,45-46

📷Unsplash.Sergey.Zolkin

📝revjeffcoz

Aasa. Magtitiwala.

"Mapalad ang mga taong nagtitiwala kay Yahweh, pagpapalain ang umaasa sa kanya." (Jeremiah 17:7)

Malapit ka na bang sumuko dahil sa hirap ng buhay? Aayaw ka na ba at tuluyan nang bibitaw?

Nawa'y matuto tayo sa halimbawa ni Lazaro sa Ebanghelyo — isang pulubing hindi nanghinawa bagkus ay ibinuhos ang buong pagtitiwala sa kabutihan ng Diyos. Dahil dito, tinamasa niya sa huli ang isang buhay na ganap at kasiya-siya — buhay na nararapat sa mga sa Diyos ay umaasa. 

Mga Pagbasa para sa Araw ng

Huwebes, March 12

2nd Week, Lenten Season

Jeremiah 17:5-10

Psalm 1

Luke 16:19-31

📷Internet.Photo

📝revjeffcoz

Huwag Matakot Mangarap

“Kapag naghahari na po kayo, paupuin ninyo sa inyong tabi ang dalawa kong anak, isa sa kanan at isa sa kaliwa.” (Matthew 20:21)

Kaya ba nating ihayag ng lantaran ang ating mga pinapangarap?

Sa ating pananalangin, huwag mahihiyang iparating sa Diyos ang tunay na nilalaman ng ating puso. Huwag matakot, mag-alinlangan, o magdadalawang-isip. Magtiwalang dadalisayin Niya ang ating pinapangarap at ipagkakaloob ang batid Niyang sa atin ay tunay na makabubuti. 

Mga Pagbasa para sa Araw ng

Miyerkules, March 11

2nd Week, Lenten Season

Jeremiah 18:18-20

Psalm 31

Matthew 20:17-28

📷Unsplash.Martin.Widenka

📝revjeffcoz

Pagbabago

“Nagbago ang anyo ni Jesus sa harap nila: nagningning gaya ng araw ang kanyang mukha at kuminang na puting-puti ang kanyang damit gaya ng liwanag.” (Mateo 17:2)

Nakakahawa ang kaningningan ni Jesus. Ngayong panahon ng Kuwaresma, tahimik Niya tayong binabago at hinuhubog — ibinabalik ang orihinal nating ganda at buti. Nawa ay hayaan natin ang Kanyang mga Kamay ang siyang magbigay direksyon sa atin tungo sa hangarin ng Diyos Ama. Hayaan natin ang ating mga sarili na malunod sa Kanyang nining upang sa huli ay makapagbigay liwanag din tayo sa kapwa. 

Mga Pagbasa para sa Araw ng

Linggo, March 8

2nd Week, Lenten Season

Genesis 12:1-4a

Salmo 33

2 Timoteo 1:8b-10

Mateo 17:1-9

📷Unsplash.Ales.Me

📝revjeffcoz

Pag-ibig Para sa Lahat

“Sinsabi ko sa inyo: Mahalin ninyo ang inyong kaaway, at ipagdasal ang mga umuusig sa inyo.” (Matthew 5:44)

Pinasan ni Hesus ang krus bilang paghahayag ng Kanyang pag-ibig. Subalit ginawa Niya ito hindi lamang alang-alang sa mga sa Kanya ay naniniwala at umiibig. Inialay Niya ang Kanyang buhay maging para sa mga sa Kanya ay umuusig. 

Tayo kaya? Hanggang saan natin kayang umibig?

Mga Pagbasa para sa Araw ng

Sabado, March 7

1st Week, Lenten Season

Deuteronomy 26:16-19

Psalm 119

Matthew 5:43-48

📷Unsplash

📝revjeffcoz

Bunutin ang Ugat ng Pagkakasala

“Ang pagbabalik-loob ninyo ay aking gusto upang kayo’y mabuhay!” (Ezekiel 18:23)

Kakambal ng ating pagbabalik-loob ang pagwawaksi at pagtalikod sa kasalanan. 

Nawa ay ating pakatatandaan: Ang pagpuril sa kasalanan ay tulad ng pagpatay sa isang damong ligaw. Kailangang maingat na masunson ang ugat at bunutin ito. Dahil kung puputulin lamang ang mga sanga nito, tiyak na babalik-balik at pagkakasala ay mauulit lang nang mauulit. 

Mga Pagbasa para sa Araw ng

Biyernes, March 6

1st Week, Lenten Season

Ezekiel 18:21-28

Salmo 130

Mateo 5:20-26

📷Unsplash

📝revjeffcoz

Diyos ng Pagtangis

Kanino tayo lumalapit at tumatangis kapag nagigipit at namimilipit?

“Bibigyan niya ng mabubuting bagay ang sinumang humihingi sa kanya!” (Matthew 7:11)

Sa pagtangis ni Hesus sa daan ng kalbaryo, kailan man ay hindi Siya nag-isa. Kasama at kaisa Niyang tumangis ang Diyos Ama. Ang tahimik Niyang pagdaing ay dinidinig naman ng Ama. 

Kanino tayo lumalapit at tumatangis kapag nagigipit at namimilipit?

Ngayong panahon ng Kuwaresma, binibigyang halimbawa tayo ni Hesus sa panahon ng ating mga pagtangis. Binibigyan N’ya tayo ng panibagong pag-asa. Ipinakikilala Niya ang kabutihan ng Diyos Ama na karamay natin at Siyang pumapawi sa anumang ating pighati.

Mga Pagbasa para sa Araw ng

Huwebes, March 5

1st Week, Lenten Season

Esther 4:12,14-16,23-25

Psalm 138

Matthew 7:7-12

📷Unsplash|NunoAlberto

📝revjeffcoz

Tagapaghayag ng Pagbabago

“Pumunta ka sa Lunsod ng Nineve at ipahayag mo ang mga ipinasasabi ko sa iyo.” (Jonah 3:2)

Anong uri ng presensya ang ating dala-dala? Galit, inggit, o pagkakawatak-watak ba?

Ngayong panahon ng Kuwaresma, nawa ang bawat isa ay maging tanda ng pagbabago. Sa pamamagitan ng ating ikinikilos at sinasalita, nawa’y maging buhay tayong tagapagpatotoo upang maakay ang kapwa tungo sa pagbabalik-loob at pagpapanibago. 

Mga Pagbasa para sa Araw ng 

Miyerkules, March 4

1st Week, Lenten Season

Jonah 3:1-10

Psalm 51

Luke 11:29-32

📷media.swncdn.com

📝revjeffcoz

Ang Ama Natin

"Alam na ng inyong Ama na nasa langit ang inyong kailangan bago pa ninyo ito hingin sa kanya." (Matthew 5:8)

Ang Ama natin ay lubhang mapagbigay. Ipagkakaloob Niya ang sa atin ay alam Niyang makabubuti at ito'y Kanyang binibigyang katuparan sa Kanyang itinakdang panahon. Maaring maantala ang Kanyang kasagutan, pero wala Siyang anak na pinahihindihan.

Mga Pagbasa para sa Araw ng 

Martes, March 3

1st Week, Lenten Season

Isaias 55:10-11

Psalm 34

Matthew 6:7-15

📷InternetPhoto

📝revjeffcoz

Paano Ang Kapwa?

"Ibigin mo ang iyong kapwa gaya ng pag-ibig mo sa iyong sarili." (Leviticus 19:18)

[Isang gasgas na kwento] Nang halos lahat nga mga kabataan ay nakapaghayag na ng kanilang gusto paglaki at tumumbok sa iisang layunin -- ang tumulong sa kapwa -- isang bata ang naglakas loob magbahagi, "Gusto kong maging kapwa...para tiba-tiba."

"Ibigin mo ang iyong kapwa gaya ng pag-ibig mo sa iyong sarili."

Pero sa ngayon, tiba-tiba pa rin nga ba ang kapwa? Iniibig pa rin ba natin sila tulad ng ating pag-ibig sa ating sarili? O ang lahat ay natutuon na lang sa sarili at nagiging makasarili?

Nananahan si Hesus sa ating kapwa. Pagkakaitan ba natin Siya ng panahon, tulong at pagmamahal kung Siya ay nararamtan ng kahirapan, sakit, at pagkaulila?

Mga Pagbasa para sa Araw ng

Lunes, March 2

1st Week, Lenten Season

Leviticus 19:1-2,11-18

Psalm 19

Matthew 25:31-46

📷InternetPhoto

📝revjeffcoz

Anak Tayo ng Diyos

“Kung ikaw ang Anak ng Diyos!”

Sa Ebanghelyo ay makailang ulit itong binanggit ng diyablo nang tatlong beses niyang tuksuhin si Hesus. 

“Kung ikaw ang Anak ng Diyos!”

Sa pagbabanggit nito ng diyablo ipinapakitang maging siya ay kumukilalang sa Hesus ay Diyos — ang pagkakaiba nga lamang ay pinili ng diyablong tumalikod sa Kanya.

“Kung ikaw ang Anak ng Diyos!”

Sa panahong ito ng Kuwaresma, apatnapung araw tayong maghahanda at magpapanibago ng sarili. Nalalapit na ang Pasko ng Pagkabuhay. Nalalapit na rin ang ating pagpapanariwa sa Binyag kung saan ay naituring tayo bilang mga anak ng Diyos. 

“Kung ikaw ang anak ng Diyos!”

Maging maingat tayo sa panahong ito ng paghahanda at pagpapanibago ng sarili. And demonyo ay tila ahas na nakaambang upang tayo ay siluin. Magdo-double time siya.

“Kung ikaw ang anak ng Diyos!”

Subalit sa ating pagkatakot magtiwalang kaya nating gapiin ang tukso. Higit na makapangyarihan ang Diyos. Sa pusong nagbabalik-loob hindi magkukulang ang grasya ng pagpapanibagong kaloob. 

Sapagkat tayo ay mga anak ng Diyos!

Mga Pagbasa para sa Araw ng

Linggo, March 1

1st Week, Lenten Season

Genesis 2:7-9,3:1-7

Psalm 51

Romans 5:12-19

Matthew 4:1-11

📷Unsplash

📝revjeffcoz 

Magbalik-loob

“Hindi ako pumarito para tawagin ang mga mabubuti kundi ang mga makasalanan tungo sa pagbabalik-loob.” (Luke 5:32)

Magpapakipot pa ba tayo? Kapag si Hesus na ang nanuyo, aayaw at magpaptumpik-tumpik pa rin ba tayo?

Si Hesus na ang unang nagmahal...Siya pa rin ang unang sinaktan. Subalit lahat ng ito’y hindi naging hadlang upang Siya’y patuloy na magmahal. Siya pa rin ang patuloy na nauunang lumapit upang ihayag ang kanyang kagustuhang magbalik tayo sa Kanya. Oo nga’t hindi tayo karapat-dapat pero pinatutunayan Niya na ang pag-ibig Niya’y para sa lahat. 

Mga Pagbasa para sa Araw ng

Sabado, February 29

Lenten Season

Isaiah 58:9-14

Psalm 86

Luke 5:27-32

📷internetphoto

📝revjeffcoz

Pusong Natatakam Magmahal

"Ganyan ba ang pag-aayunong aking kaluluguran?" (Isaiah 58:5)

Saan tayo dinadala ng ating pag-aayuno at masidhing pagtitimpi ng sarili? 

Kung ang pagtalima sa mga gampaning ito ay dahil lamang sa mga kadahilanang napapanahon at nauuso, kaluluguran ba ng Diyos ang pagkalam ng ating tiyan?

Sana ang ginagawa nating pagtitiis ay makapukaw sa ating mga puso upang magising sa tunay na pakiramdam ng mga kapatid nating higit na nanganagilangan. Hayaan nating ang ating mga puso ay siyang higit na manabik at tunay na maghanap ng pagkakataong magmahal.

Mga Pagbasa para sa Araw ng

Biyernes, February 28

Lenten Season

Isaias 59:1-9

Psalm 51

Matthew 9:14-15

📷Unsplash

📝revjeffcoz

Pag-ibig, Pakikinig, Katapatan

"Ibigin ninyo ang Panginoon, makinig sa Kanyang tinig at manatiling tapat sa Kanya." (Deuteronomy 3:20)

Hanap mo ba ay daan tungo sa puso ng iyong sinisinta? 

Maging 'yan man ay patungo sa Diyos, sa iyong mga magulang, kapatid, kapamilya o special someone...tatlong bagay ang kaloob ng Unang Pagbasa. Kung gusto mo ng forever, matutong tunay na umibig, makinig at maging tapat. 

Mga Pagbasa para sa araw ng

Huwebes, February 27

Lenten Season

Deuteronomy 30:15-20

Psalm 39

Luke 9:22-25

📷Unsplash|SteveYang

📝revjeffcoz

Sabi ni Hesus: Back, Pri!

“Mataimtim kayong magsisi at manumbalik sa akin, kayo’y mag-ayuno, manangis at magdalamhati.” (Joel 2:12)

Bawat isa sa atin ay sugatan — dahil sa ating mga kahinaan, pagkakamali, kahirapan, pagkukulang o kasalanan. Subalit sa sandaling ito, malinaw ang imbitasyon sa atin ni Hesus bilang kaibigan, “Back, Pri.”

Ang araw na ito, Miyerkules ng Abo, ay pasimula ng ating paglalakbay ng pag-uwi. Uuwi tayo sa Ama upang magbalik-loob. Ang ating pagsisisi, pag-aayuno, pagtangis, pagdadalamhati at paggawa ng mabuti ay ang daang tatahakin natin sa panunumbalik sa Diyos. 

Mga Pagbasa para sa Araw ng

Miyerkules, February 26

Ash Wednesday, Lenten Season

Joel 2:12-18

Psalm 51

2 Corinthians 5:20-6:2

Matthew 6:1-6,16-18

📷internetphoto

📝revjeffcoz

Isang Hakbang Papalapit

“Lumapit kayo sa Diyos at lalapitan niya kayo.” (James 4:8)

Kumusta ang ating ugnayan kay Hesus? Higit ba tayong napapalapit sa Kanya? O sa kabila ng mga himalang ginagawa Niya sa ating buhay ay nakabibitaw pa rin tayo at nawawalay sa Kanyang presensya?

Nakakadala man kung ating pakakaisipin ang nagagawa nating pagtalikod sa Kanya, hindi pa rin tayo nililimot ng Diyos. Tulad ng ginawa niya sa mga alagad, patuloy pa rin Niya tayong tatanggapin at tuturuan ng paulit-ulit upang huwag mawalay sa Kanya. 

Isang HAKBANG lang papalapit sa Kanya ang ngayon ay hinihingi Niya. At may katiyakang magiliw at paTAKBO na Niya tayong sasalubungin.

Mga Pagbasa para sa Araw ng

Martes, February 25

7th Week, Ordinary Time

James 4:1-10

Psalm 55

Mark 9:30-37

📷Unsplash|LucasBornhauser

📝revjeffcoz

Mananalig at Patuloy na Kakapit

Kakayanin ba natin? Malalampasan pa kaya ang malalaking suliranin? Mapapagtagumpayan pa ba ang mabibigat na pasanin?

Kakayanin! Subalit hindi sa pamamagitin ng sarili nating kakayahan bagkus ay sa kapangyarihan ng Maykapal. Kaya patuloy na manalig. Lahat ay posible. Kung naninimdim na ang pagtitiwala...ipanalanging palakasin ng Diyos ang ating pananampalataya. 

Mga Pagbasa para sa Araw ng

Lunes, February 24

7th Week, Ordinary Time

James 3:13-18

Psalm 19

Mark 9:14-29

📷Unsplash

✏️revjeffcoz

Hanggang Saan Mo Kayang Magmahal?

“Pinasisikat ng Diyos ang araw sa masasama at mabubuti, at pinapapatak Niya ang ulan sa mga banal at sa mga makasalanan.” -Matthew 5:45

Hanggang saan mo kayang magmahal? Sinu-sino ang kaya mong ibigin at tanggapin? Namimili ba ang iyong puso at pilit nang nilalayuan at iniiwasan ang mga kinadalaan? At kung wala ng kapalit na bumabalik bagkus ang dumarating ay tanging hapdi at sakit, mangangahas ka pa rin bang umibig?

Tinuruan tayo ng Diyos na umibig upang lumago at mabatid sa sarili na kaya nating umigpaw sa pamantayan ng mundo. Binigyan tayo ng kakayahang magmahal upang — katulad ni Hesus — ay maipakitang kaya nating yakapin ang sinuman kahit na may kalakip na bigat ng krus. Masasaktan...mabibigo...at maaari ring walang matatamo subalit hindi hihinto ang pagtibok ng puso. 

Kung papaanong sa Krus ay ipinakita at ipinadama sa atin ni Hesus ang totoong pagmamahal — pag-ibig na walang pinipili at para sa lahat — sana all kaya rin nating tanggapin at pakamahalin. 

Mga Pagbasa para sa araw ng

Linggo, February 23

7th Week, Ordinary Time

Leviticus 19:1-2,17-18

Psalm 102

1 Corinthians 3:16-23

Matthew 5:38-48

📷unsplash||NijwamSwargiary

✏️RevJeffCoz