BANAL NA ORAS PARA SA IKAHUHUPA NG SALOT NA COVID-19

BANAL NA ORAS 

PARA SA IKAHUHUPA NG SALOT NA COVID-19

 

(AVC Araw ng Pananalangin at Pag-aayuno – 25 Marso 2020)

 

PAGTATANGHAL NG SANTISIMO SAKRAMENTO

 

O salutaris Hostia

Que caeli pandis ostium

Bella premunt hostilia

Da robur fer auxilium

 

Uni trinoque Domino

Sit sempiterna Gloria

Qui vitam sine termino

Nobis donet in patria

 

(itatanghal ng punong tagapagdiwang ang Banal na Sakramento sa altar at iinsensuhan)

 

 

PAMBUNGAD

 

N:​Papuri sa Diyos Ama, Hari ng Sangkalupaan,karapat-dapat sa lahat ng papuri’t pasasalamat.

 

B:​Purihin at ipagdangal ang Poon magpakailanman.

 

N:​Papuri sa Bugtong na Anak, ipinanganak ng Birheng Mahal para sa kaligtasan ng lahat.

 

B: ​Purihin at ipagdangal ang Poon magpakailanman.

 

N:​Papuri sa Espiritung Banal, gabay ng simbahan tungo sa kaganapan ng katotohanan.

 

B: ​Purihin at ipagdangal ang Poon magpakailanman.

 

 

PAUNANG SALITA

 

N:​Mga kapatid, natitipon tayo ngayon upang ipahayag ang ating pagtitika at pagsusumamo saPanginoon na wakasan na ang salot na dulot ng COVID-19. Bagaman tayo ay malimit tumalikod sa pagmamahal ng Panginoon, hindi niya tayo pinababayaan.  Muli’t muli niyang iniaalok sa atin ang kanyang tipan at ang kanyang walang hanggang pag-ibig. Dumulog tayo ngayon at buong pusong hilingin ang kanyang pagbabasbas sa ating pamayanan at sa buong mundo, at upang magwakas na ang salot na ating kinakaharap. 

 

 

PAMBUNGAD NA PANALANGIN

 

N:​Manalangin tayo.

 

Ama naming Makapangyarihan, 

lakas ka ng mga walang inaasahan kundi ikaw. 

Ang pagluhog namin ay iyong pagbigyan, 

sapagkat kami’y mga tao lamang 

na pawang mahihina kapag iyong iniwanan. 

Kaya naman kami’y iyong laging tulungan 

upang sa pagtupad sa iyong mga kautusan, 

ikaw ay aming mabigyang kasiyahan 

sa aming iniisip at ginagawa araw-araw. 

Sa pamamagitan si Hesukristo, 

kasama ng Espiritu Santo, 

magpasawalang hanggan. 

 

B: ​Amen.

 

(magsisiupo ang lahat) 

 

 

UNANG PAGBASA 

 

Magsisi kayo ng taos sa puso at hindi pakitang-tao lamang.

 

N:​Pagbasa mula sa aklat ni Propeta Joel (2:12-18)

 

Sinasabi ngayon ng Panginoon: “Mataimtim kayong magsisi at manumbalik sa akin, kayo’y mag-ayuno, manangis at magdalamhati. Magsisi kayo ng taos sa puso, hindi pakitang tao lamang.  Magbalik-loob kayo sa Panginoon na inyong Diyos.  Siya’y may magandang-loob at puspos ng awa, mapahinuhod at tapat sa kanyang pangako; laging handang magpatawad at hindi mapagparusa.  Maaaring lingapin kayo ng Panginoon at bigyan ng masaganang ani. Kung magkagayon, mahahandugan natin siya ng haing butil at alak. Ang trumpeta ay hipan ninyo, sa ibabaw ng Bundok ng Sion; iutos ninyo na mag-ayuno ang lahat, tawagin ninyo ang mga tao para sa isang banal na pagtitipon. Tipunin ninyo lahat, matatanda’t bata, pati mga sanggol at maging ang mga bagong kasal.  Mga saserdote, kayo’y tumayo sa pagitan ng pasukan at ng dambana, manangis kayo’t manalangin nang ganito: “mahabag ka sa iyong bayan, O Panginoon.  Huwag mong tulutang kami’y hamaki’t pagtawanan ng ibang mga bansa at tanungin,  Nasaan ang iyong Diyos?” Pagkaraan, ipinamalas ng Panginoon na siya’y nagmamalasakit sa kanyang bayan.

 

Ang Salita ng Diyos

 

B:​Salamat sa Diyos

 

(sandaling katahimikan at pagninilay)

 

 

SALMONG TUGUNAN

 

Tugon:​Poon kami’y iyong kaawaan kaming sa‘yo’y nagsisuway.

 

Akoy kaawaan O mahal kong Diyos, sang-ayon sa iyong kagandahang-loob, ang mga kasalanan ko’y iyong pawiin, ayon din sa iyong pag-ibig sa akin. Linisin mo sana ang aking karumihan at ipatawad mo yaring kasalanan.

 

Tugon:​Poon kami’y iyong kaawaan kaming sa‘yo’y nagsisuway.

 

Ang pagsalansang ko ay kinikilala, laging nasa isip ko at alaala. Sa iyo lang ako nagkasalang tunay, at ang nagawa ko’y di mo nagustuhan.

 

Tugon:​Poon kami’y iyong kaawaan kaming sa‘yo’y nagsisuway.

 

Isang pusong tapat sa aki’y likhain, bigyan mo, O Diyos, ng bagong damdamin. Sa iyong harapan huwag akong alisin, ang Espiritu mo ang papaghariin.

 

Tugon:​Poon kami’y iyong kaawaan kaming sa‘yo’y nagsisuway.

 

Ang galak na dulot ng ‘yong pagliligtas, ibalik at ako ay gawin mong tapat. Turuan mo akong makapagsalita, at pupurihin kita sa gitna ng madla.

 

Tugon:​Poon kami’y iyong kaawaan kaming sa‘yo’y nagsisuway.

 

 

IKALAWANG PAGBASA

 

Pinakamabuting magagawa ng tao ay buong tiyagang maghintay sa pagliligtas ng Panginoon.

 

N:​Pagbasa mula sa aklat ng mga Panaghoy (3:17-26)

 

Sa akin ay wala ni bakas ng kalusugan, katiwasayan at kaligayahan. Kaya’t sinasabi ko, “Nawala na ang aking lakas at ang aking pag-asa sa Panginoon.” Simpait ng apdo ang alalahanin saaking paghihirap at kabiguan, lagi ko itong naaalala, at ako’y labis na napipighati. Gayunma’y nanunumbalik ang aking pag-asa kapag naaalala ko ito: ang hindi magmamaliw na pag-ibig ng Panginoon, at ang kanyang walang kupas na kahabagan. Hindi nagbabago tulad ng bukang liwayway. Dakila ang kanyang katapatan. Ang Panginoon ay akin, sa kanya ako nagtitiwala. Ang Panginoon ay mabuti sa mga nagtitiwala sa kanya, pinakamabuting magagawa ng tao ay buong tiyagang maghintay sa pagliligtas ng Panginoon. 

 

Ang Salita ng Diyos

 

B:​Salamat sa Diyos

 

(sandaling katahimikan at pagninilay)

 

 

AWIT

 

SINO’NG MAKAPAGHIHIWALAY 

 

Sino’ng makapaghihiwalay

Sa atin sa pag-ibig ni Kristo?

Sino’ng makapaghihiwalay sa atin

Sa pag-ibig ng Diyos?

 

Paghihirap ba? Kapighatian?

Pag-uusig o gutom o tabak?

At kahit na ang kamatayan

Walang makapaghihiwalay sa atin

Sa pag-ibig ng Diyos. 

 

Ang Ama kayang mapagtangkilik

O anak na nag-alay ng lahat

Saan man sa langit o lupa

Walang makapaghihiwalay sa atin

Sa pag-ibig ng Diyos. 

 

 

MABUTING BALITA 

 

N:​Ang Mabuting Balita ng Panginoon ayon kay San Mateo (8:14-17)

 

B:​Papuri sa iyo, Panginoon.

 

Noong panahong iyon, pumunta si Hesus sa bahay ni Pedro at doo’y nakita niya ang biyenan nito, nakahiga at inaapoy ng lagnat. Hinawakan niHesus ang kamay ng babae at nawala ang lagnat nito. Pagkatapos, bumangon ito at naglingkod sakanya. Nang gabi ding iyon, dinala kay Hesus ang maraming inaalihan ng mga demonyo. Sa isang salita lamang ay pinalayas niya ang masasamang espiritu, at pinagaling ang lahat ng may karamdaman. Ginawa niya ito upang matupad ang sinabi ni Propeta Isaias, “Kinuha niya ang ating mga kahinaan at binata ang ating mga karamdaman.

 

Ang Mabuting Balita ng Panginoon

 

B:​Pinupuri ka naming, Panginoong Hesukristo.

 

 

PAGNINILAY 

 

(magbibigay ang pari ng pagninilay)

 

 

MAPANALANGING KATAHIMIKAN

 

 

AWIT

 

DIYOS AY PAG-IBIG

 

Pag-ibig ang siyang pumukaw
Sa ating puso at kaluluwa
Ang siyang nagdulot sa ating buhay
Ng gintong aral at pag-asa

Pag-ibig ang siyang buklod natin
Di mapapawi kailan pa man
Sa puso’t diwa tayo’y isa lamang
Kahit na tayo’y magkawalay. 

 

Pagka’t ang Diyos natin Diyos ng pag-ibig
Magmahalan tayo’t magtulungan
At kung tayo’y bigo, ay h’wag limutin
Na may Diyos tayong nagmamahal

Sikapin sa ating pagsuyo
Ating ikalat sa buong mundo
Pag-ibig ni Hesus ang siyang sumakop
Sa bawa’t pusong uhaw sa pagsuyo. 

 

 

PANGKALAHATANG PANALANGIN

 

N:​Lumuhog tayo sa Ama sa kalangitan na pinili ang kanyang Anak upang maging ating tagapagligtas. Puno ng pagtitiwala humiling tayo ng lakas at gabay para sa ating lahat.

 

B: ​Panginoon, dinggin mo ang aming panalangin.

 

N: ​Idinadalangin namin ang buong Simbahan lalo’t higit para sa mga namumuno dito, ang Santo Papa, mga Obispo, mga pari at mga diyakono. Pagkalooban mo sila ng pusong handang laging maglingkod para sa kapakanan ng lahat.  Manalangin tayo sa Panginoon.

 

B: ​Panginoon, dinggin mo ang aming panalangin.

 

N: ​Idinadalangin namin ang mga umuugit sa ating pamahalaan. Pagkalooban nawa sila ng Diyos ng kalakasan ng katawan at kalooban upang magawa nilang akayin ang sambayanan ng Diyos tungo saliwanag ng kaligtasan.  Manalangin tayo saPanginoon.

 

B: ​Panginoon, dinggin mo ang aming panalangin.

 

N: ​Idinadalangin namin ang mga dalubhasa at mga manggagamot upang sa biyaya ng karunungan at kaalamang ipinagkaloob sa kanila ng Diyos ay magtamasa nawa ang lahat ng tao ng kalusugan at kaligtasan mula sa karamdamang pangkatawan at pang kalooban.  Manalangin tayo sa Panginoon.

 

B: ​Panginoon, dinggin mo ang aming panalangin.

 

N: ​Idinadalangin namin ang sangkatauhan, ang ating bansa at pamayanan, iligtas nawa tayo ng Diyos mula sa kapahamakang idinudulot ng sakit na COVID-19. Pagkalooban nawa ng pagkakaisa at pagmamahalan ang lahat upang magapi ang nakamamatay na karamdamang ito.  Manalangin tayo sa Panginoon.

 

B: ​Panginoon, dinggin mo ang aming panalangin.

 

N: ​Idinadalangin namin ang mga taong may karamdaman at nagdurusa dahil sa COVID-19. Pagkalooban nawa sila ng Diyos ng malalim napagtitiwala sa kanya at ng kagalingan mula sa kanilang karamdaman. Manalangin tayo saPanginoon.

 

B: ​Panginoon, dinggin mo ang aming panalangin.

 

N: ​Idinadalangin namin ang lahat ng pumanaw nadahil sa karamdamang COVID-19. Pagkalooban nawa sila ng kapayapaan at pamamahingang walang hanggan kasama ang lahat ng anghel at banal doon sa kalangitan. Manalangin tayo saPanginoon.

 

B: ​Panginoon, dinggin mo ang aming panalangin.

 

 

AMA NAMIN

 

N:​Manalangin tayo ayon sa dasal na itinuro sa atin ng Panginoong Hesukristo: (aawitin)

 

Ama namin, sumasalangit ka.

Sambahin ang ngalan mo.

Mapasaamin ang kaharian mo.

Sundin ang loob mo dito sa lupa 

para lang sa langit.

Bigyan mo kami ngayon 

ng aming kakanin sa araw-araw.

At patawarin mo kami sa aming mga sala

para nang pagpapatawad namin 

sa nagkakasala sa amin.

At huwag mo kaming ipahintulot sa tukso.

At iadya mo kami sa lahat ng masama.

 

 

ORATIO IMPERATA

 

Makapangyarihan at mapagmahal na Ama,

nagsusumamo kami sa iyoupang hilingin 

ang iyong patnubay laban sa COVID-19

na nagpapahirap sa marami at kumitil na ng mga buhay.

 

Gabayan mo ang mga dalubhasang naatasan

na tumuklas ng mga lunas at paraan

upang ihinto ang paglaganap nito.

Patnubayan mo ang mga lumilingap sa maysakit

upang ang kanilang pagkalinga

ay malakipan ng husay at malasakit.

Itinataas namin ang mga nagdurusa.

Makamtam nawa nila ang mabuting kalusugan.

Lingapin mo rin ang mga kumakalinga sa kanila.

Pagkamitin mo ng kapayapaang walang hanggan

ang mga pumanaw na.

 

Pagkalooban mo kami ng biyaya

na magtulong-tulong tungo sa ikabubuti ng lahat.

Pukawin sa amin ang pagmamalasakit 

sa mga nangangailangan.

 

Nagsusumamo kami na iyong ihinto na 

ang paglaganap ng virus

at ipag-adya kami sa lahat ng mga takot.

 

Hinihiling naming ito sa pamamagitan ni Hesukristo

na nabubuhay at naghaharing kasama mo at ng Espiritu Santo,

iisang Diyos, magpasawalang hangan. Amen.

 

Dumudulog kami sa iyong patnubay, Mahal na Ina ng Diyos.

Pakinggan mo ang aming mga kahilingan

sa aming pangangailangan

at ipagadya mo kami sa lahat ng kasamaan,

maluwalhati at pinagpalang Birhen. Amen.

 

Mahal na Birhen, mapagpagaling sa maysakit, 

ipanalangin mo kami.

San Rafael Arkanghel, ipanalangin mo kami.

San Roque, ipanalangin mo kami.

San Lorenzo Ruiz, ipanalangin mo kami.

San Pedro Calungsod, ipanalangin mo kami.

 

 

PANALANGIN NI PAPA FRANCISCO SA MAHAL NA BIRHEN LABAN SA COVID-19

 

O Maria, tanglaw mo’y ‘di nagmamaliw 

sa aming paglalakbay bilang tanda 

ng aming kaligtasan at pag-asa.

 

Ipinagkakatiwala namin ang aming sarili sa iyo, 

Kagalingan ng Maysakit, na sa Krus ay naging malapit 

sa pagpapakasakit ni Kristo, 

na siyang nagpatibay sa iyong pananampalataya.

 

Ikaw, kaligtasan ng mga Romano [Filipino], 

ay nakababatid ng aming mga pangangailangan, 

at nananalig kaming tutugunan mo 

itong aming mga kinakailangan upang, 

tulad ng sa Cana ng Galilea, manumbalik ang kasiyahan 

at pagdiriwang matapos ang sandali ng pagsubok na ito.

 

Tulungan mo kami, Ina ng Banal na Pag-ibig, 

nang maiayon namin ang aming mga sarili 

sa kalooban ng Ama at maisakatuparan ang utos ni Jesus, 

na Siyang kusang nagpakasakit, at umako sa aming hapis, 

upang akayin kami, sa pamamagitan ng Krus, 

tungo sa Muling Pagkabuhay.  Amen.

 

Dumudulog kami sa iyong pagkalinga, 

O Mahal na Ina ng Diyos.

 

Huwag mong siphayuin ang aming pagluhog 

– kaming nasa gitna ng pagsubok – 

at ipag-adya mo kami sa lahat ng kapahamakan, 

O maluwalhati at pinagpalang Birhen.

 

 

BENEDICTION

 

(iinsensuhan ng punong tagapagdiwang ang sakramento at aawitin ang mga sumusunod)

 

Tantum ergo sacramentum

Venermur cernui

Etr antiquum documentum

Novo cedat ritui :

Preastet fides supplementum

Sensuum defectui.

 

Genitori genitoque

Laus et jubilatio

Salus honor virtus quoque

sit et benediction

procedenti abutroque

Comparsit Laudatio. Amen.

 

N:​Panem de coelo praestitisti eis.

 

B:​Omne delectametum in se habentem.

 

N:​Oremus:

 

Deus qui nobis sub sacramento mirabili 

 

passionis tuae memoriam relequisti

tribue quesumus, ita nos corporis et sanguinis 

tui sacra mysteria venerari

ut redemptionis tuae fructum in nobis iugiter sentiamus.

Qui vivis et regnas in saecula saeculorum.

 

B: ​Amen.

 

 

BENEDICTION +

 

 

PAGPUPURI

 

Purihin ang Diyos.

Purihin ang kanyang santong ngalan.

Purihin si Hesukristo Diyos na totoo at tao namang totoo.

Purihin ang ngalan ni Hesus.

Purihin ang kanyang kabanal-banalang Puso.

Purihin ang kanyang kamahal-mahalang Dugo.

Purihin si Hesukristo sa Santisimo Sakramento sa Altar.

Purihin ang Espiritu Santo ang mang-aaliw.

Purihin ang dakilang ina ng Diyos si Maria Santisima.

Purihin ang kalinis-linisang paglilihi sa kanya.

Purihin ang maluwalhating pag-akyat kay Maria kaluluwa at katawan.

Purihin ang ngalan ni Maria birhen at ina.

Purihin si San Jose ang kanyang kalinis-linisang esposo.

Purihin ang Diyos sa kanyang mga anghel at kanyang mga Santo. 

 

 

O SACRAMENT MOST HOLY

 

O Sacrament Most Holy

O Sacrament Divine

All praise and all thanksgiving

Be every moment thine

Be every moment thine.​

 

 

SALVE REGINA

 

Salve Regina, mater misericordiae:
Vita, dulcedo, et spes nostra, salve.
Ad te clamamus, exsules, filii Hevae.
Ad te suspiramus, gementes et flentes
in hac lacrimarum valle.
Eia ergo, Advocata nostra,
illos tuos misericordes oculos ad nos converte.
Et Iesum, benedictum fructum ventris tui,
nobis, post hoc exsilium ostende.
O clemens: O pia: O dulcis
Virgo Maria.

Banal na Oras para sa Ikahuhupa ng Salot ng COVID-19